ബെംഗളൂരു: ആർ.എസ്.എസിന്റെ നൂറാം വാർഷികാഘോഷങ്ങളുടെയും വിജയദശമിയുടെയും ഭാഗമായി കർണാടകയിലെ വിവിധ കേന്ദ്രങ്ങളിൽ കനത്ത പോലീസ് സുരക്ഷയിൽ പാഥസഞ്ചലനം (റൂട്ട് മാർച്ച്) സംഘടിപ്പിച്ചു. തലസ്ഥാനമായ ബംഗളൂരുവിലെ ജയനഗർ, ചാമരാജ്പേട്ട് തുടങ്ങിയ നിരവധി പ്രദേശങ്ങളിൽ നടന്ന ചടങ്ങുകളിൽ മുതിർന്ന ബി.ജെ.പി നേതാക്കളായ ആർ. അശോക, ചലവാദി നാരായണസ്വാമി, മുൻ ബംഗളൂരു പോലീസ് കമ്മീഷണർ ഭാസ്കർ റാവു എന്നിവർ പങ്കെടുത്തു. കുട്ടികളും യുവാക്കളും മുതിർന്നവരും ഉൾപ്പെടെ നൂറുകണക്കിന് സ്വയംസേവകരാണ് വാദ്യമേളങ്ങളുടെ അകമ്പടിയോടെ മാതൃഭൂമിക്ക് പ്രണാമമർപ്പിച്ച് മാർച്ചിൽ അണിനിരന്നത്. ചാമരാജ്പേട്ടിൽ വിവിധ വീഥികൾ ചുറ്റി സഞ്ചരിച്ച മാർച്ച് സിദ്ധാരൂഢ ആശ്രമത്തിന് മുന്നിൽ സമാപിച്ചു.
അതേസമയം, അനുമതിയുമായി ബന്ധപ്പെട്ട തർക്കങ്ങളെ തുടർന്ന് ചില ജില്ലകളിൽ മാർച്ച് മാറ്റിവെക്കുകയോ റദ്ദാക്കുകയോ ചെയ്തു. ബിരുദധാരികളുടെ മണ്ഡലത്തിലേക്ക് നിയമനിർമ്മാണ കൗൺസിൽ തിരഞ്ഞെടുപ്പ് നടക്കുന്നതിനാൽ തുമകൂരുവിൽ നിശ്ചയിച്ചിരുന്ന മാർച്ച് മാറ്റിവെച്ചു. കോലാർ ജില്ലയിലെ മുൾബാഗലിൽ ഒക്ടോബർ 31-ലേക്ക് പുനഃക്രമീകരിച്ചപ്പോൾ, ഡെപ്യൂട്ടി കമ്മീഷണർ അനുമതി പിൻവലിച്ചതിനെ തുടർന്ന് ചിക്കബെല്ലാപൂരിൽ പരിപാടി മാറ്റിവെക്കുകയായിരുന്നു. കൊപ്പളിലും അനുമതി ലഭിക്കാത്തതിനെ തുടർന്ന് മാർച്ച് നീട്ടിവെച്ചതായി റിപ്പോർട്ടുകളുണ്ട്.
അതേസമയം രാമനഗര, കലബുറഗി എന്നിവിടങ്ങളിൽ കർശന ഉപാധികളോടെ പോലീസ് അനുമതി നൽകി. നിശ്ചിത പാതയിലൂടെ മാത്രം മാർച്ച് നടത്തണമെന്നും പ്രകോപനപരമായ പ്രസംഗങ്ങൾ പാടില്ലെന്നും സംഘാടകർക്ക് നിർദ്ദേശം നൽകിയിട്ടുണ്ട്. ഹുബ്ബള്ളിയിൽ മാർച്ചും അതിനുശേഷം പൊതുസമ്മേളനവും സംഘടിപ്പിച്ചു.
ആർ.എസ്.എസ് മാർച്ചുകൾക്ക് മുൻകൂട്ടി അനുമതി വാങ്ങണമെന്ന കർണാടക ആഭ്യന്തര മന്ത്രി പ്രിയങ്ക് ഖാർഗെയുടെ നിലപാടാണ് രാഷ്ട്രീയ തർക്കങ്ങൾക്ക് വഴിവെച്ചത്. പോലീസ് ഭരണകൂടത്തെ വെറുതെ വിവരമറിയിക്കുന്നതിന് പകരം കൃത്യമായ അനുമതി പത്രങ്ങൾ കൈപ്പറ്റണമെന്ന് അദ്ദേഹം വ്യക്തമാക്കിയിരുന്നു. ആയുധങ്ങളോ ലാത്തികളോ ഏന്തി പൊതുനിരത്തിലിറങ്ങുന്നതിനെ ചോദ്യം ചെയ്ത അദ്ദേഹം, നൂറു വർഷം തികഞ്ഞിട്ടും സംഘടന രജിസ്റ്റർ ചെയ്യാത്തത് എന്തുകൊണ്ടാണെന്നും ഇത്തരം വൻ പരിപാടികൾ നടത്താനുള്ള ഫണ്ടിന്റെ സ്രോതസ്സ് വ്യക്തമാക്കണമെന്നും ആർ.എസ്.എസ് മേധാവി മോഹൻ ഭാഗവതിനോട് ആവശ്യപ്പെട്ടിരുന്നു.
